كتب الشاعر أ/ اسماعيل عبد الهادي ¥بيقول زعلان ¥

★* بيقول زعلان*★
قال إيه كمان زعلان مني
ولا راضي  حتي  يكلمني
والكدب د باين ف عيونه
وبيخلف    لما   بيوعدني
تلقاه ف الحته كده معدي
وبرمشه   الجارح يغمزلي
ويشكي  من  سهر   الليل
ويحلف  بعيونه   رايدني
ويلاوع ويسوق ف دلاله
ولا يوفي مره  ف معاده
وان عاتبته  يشكي  مني
حيرني  طبعه    وأحواله
لسه  تاني  جي     تحلف
بعد  م  طال   بيا  السهر
و بدموعك......تشتكيلي
وتحلفني .......... بالقمر
قال   ايه  بيقول  ندمان
ويعيد و يزيد  ف   كلام
والهجر  كان   ف  طبعك
ولا   مره    ترد      سلام
وكمان كان   قلبك قاسي
وهجرت  سنين    و ايام
والشوق  اللي ف  عيوني
ياما  قولت  عليه  أوهام
حبك   بصحيح   حيرني
ياما    حير  قلبي   معاه
وتنام   وانت    مسهرني
لليل     اسهر         وياه
للنجم   اشكيله   هجرك
ياما  قاللي روح وانساه
وانسي  اللي قلبه قاسي
وارتاح  من  كتر  جفاه
بقلمي/اسماعيل عبدالهادي ابوالعلا