كتبت الشاعرة / داليا يحيي .. إنت عابر ..

إنت عابر في الحياة
مش مهم باقي إيه ..وللا حتي جيتها ليه
يمكن مره عيشت فيها
يمكن مره ضحكت عليك .وإنت برضو ضحكت ليها
يمكن عاش قلبك غريب وسط البشر
مطرود مصاحب ضل الشجر
عايش في عزله ..قلبك دا إيه ؟؟
زي النسيم ولا بيشبه الحجر
ليك في الحياة ميت ألف موقف
ليك في الحياة حاجات تشرف
طيبة ونقاء
ومهما تشوف .طبعك لسه فيه الوفاء
لكن في لحظة
غلطة بسيطة يمكن وحيده  لا تغتفر
عايش ما بينهم زي الجسد جوا التابوت
طبل وسقف ..كله بيعدي
والذنب رافض إنه يموت
أصرخ كمان وعلي بالآه صوت صرختك
ماهو قلبك مش طالعله صوت
قلبك من عمر فات إنتحر
ولسه فاكرينك ملاك
وإنت اللي عشت بينهم رحله طويلة وسنين هلاك
إنت اللي كان كلك غلط
إنت اللي كان أخرك الرجم بالحجارة والزلط
كسروا جناحك ولسه طالبين منك تطير
تعلاااا بضمير
بطل كسل وإسمع كلامهم
من غير جناح لازم تحلق في الفضا
حتي لو هتموت أسير
حتي لو وجعوك قوي وقلبك كسير
نفعك بإيه  بس السكوت ؟؟
بقيت ضحية رافضة تعيش قابله تموت
الكل بيعدي فوق جراحك ..صوتك مش طالعله صوت
وعمرك كان جريدة فاضية
فين إعترافك ..فين المقال فين الخبر
فين اللي كانوا أشباه لناس
وليه قبلت الظلم يكتر
والطعنة فيك تنزف وتكبر
والقلب ولا مره إنجبر
آن الأوان .تملا الجريدة
وإكتب فيها السطر الأول والأخير
وإكتب عليها ..ماشي من غير كلمة وداع
( وإمحوا من بعدي الأثر )

بقلمي / داليا يحيي