رباعيات فن الواو .
بشعر العامية المصرية .
( العيد .. فرحة
و دروس )
كل عام وانتم بخير
يا حبايب كل عصر
الصيام دا كله خير
عالعروبة وأهل مصر
انتهى بينا المطاف
وانقضى الشهر العظيم
كل مخلص فينا شاف
قد إيه رمضان كريم
شهر مفتوح الجنان
للي أخلص في العبادة
فيه الرحمة والغفران
والكرم موجود زيادة
كل عيد وانتم بخير
والعزايم ليها طعم
أكل لحم وأكل طير
والصواني عليها كم
الفقير ما ببنسهوش
يوم العيد م العزايم
والبخيل ما بنعرفوش
أصله وقت الشدة نايم
خلي بالك من كلامي
زور قرايبك كل عيد
ابتسم وزع تهاني
للقريب ويا البعيد
العيدية مهما كانت
تسعد الطفل الصغير
والأيام دي مهما طالت
أسرع م البرق تطير
كلنا فى العيد حبايب
مهما زاد بينا الخلاف
واللي يزعل أو يعايب
ينسى فى العيد النكاف
يوم العيد فرحة وبس
ننطلق نلعب نسافر
خلي عندك رحمة حس
باليتيم وجبه وتذاكر
كل عام وانتم بخير
يا عرب أصحاب معالي
اعدلوا خلوا الضمير
فوق الروس دايما عالي
اللي يظلم ناسه غافل
مش مدرك إيه العواقب
واللي يبني ثقته عاقل
مش فاتح باب المصايب
---------------------
بقلم د / عبد الرحمن فتحي الحناوي .
من مصر .
السبت ٧ من مايو ( أيار ( سنة ٢٠٢٢ ) .
ليست هناك تعليقات:
إرسال تعليق