حكاية عاشق
السكوت في حرم الجمال ..جمال
والهمس فى ودان الجميل..دلال
اقرأ حكاية عاشق
دمعه على الخدود ..سال
ومنين يجيب الدوا
وطبيب القلوب ..قال
نظرة وهمسة ولمسة
وكلمة حب
هتخلي العمر موال
تسمحيلي
اخطي سورك..واعدي جسورك
واعيش جسورك
واستوطنك ..واحتل قلبك
ولا يوم اخونك ولا اطعنك
ده انا اسيرك ..واسير عيونك
ياجنون حبي..انا مجنونك
اديني تاشيرة دخول واقامة
لقلبك
ياجميلة القد والقامة
وان خالفتك يوم
انا اللي هقول
مع السلامة
سلمت واستسلمت
والراية البيضا رفعتها
وانا المهزوم
علشانك أعادى الكون
ومش هقبل حمامة سلام بينا
غير المأذون
ياللي مهرك عندي تبر
بميزان حساس موزون
ده انتِ اللب فى القلب
اسرتيني
وانا سابيتك..وعمري ماسبيتك
واوعدك لااهجرك
ولا يوم اسيب بيتك
صدقيني
ووعد الحر دين
لااجرحك ولا اوجعك
ولا يوم اودعك
واطوف على محاسنك
ومحراب جمالك وحسنك
وازور والزيارة واجب
والمس رمش العين والحاجب
ياام الدلال والخفة
غزال على الارض ماشي
بيدلع ويتعاجب
ياناس
ده جرح الحب نار
ياما ناس ضحكت
وناس بكت
وناس شربت مرار
ياترى احنا مين فيهم
انا اللي طرح وردي
شوك وصبار
بقلمى
محمد يونس
ليست هناك تعليقات:
إرسال تعليق