عارف
يعني إيه حبيب منك يروح
ياخد معاه روحك وله تروح
والعين تبكي وعليه تنوح
والقلب جوه الضلوع مجروح
مكسور حاضن جراحه وما يبوح
عارف
يعني إيه حبيب منك يروح
يعني تعيش مكسور الجناج
والقلب مليان جراح
يعني تحس بخنقه
مهما كان حواليك براح
والبسمة بهتة ما فيها روح
والسما ضلمة في عز الشروق
والقمر فيها مخنوق
حتي النجوم ما تشع ضوء
عارف
يعني إيه حبيب عنك يروح
يعني عايش وسط الزحمة وخايف تتوه
تضحك وجواك مخنوق
الأيام تعدي وأنت جوه طوق
فيك بيخنق ومش قادر تفوق
عارف
يعني إيه حبيب منك يروح
يعني الليل زي النهار
وإنت عايش محتار
ولا عارف تاخد قرار
صعبة الدنيا مرة
وأمر من الصبار
عارف
يعني إيه حبيب منك يروح
يعني تعيش مسجون جوه ذاتك
تفتكر أجمل ذكرياتك
يمكن تقدر تعيش حياتك
و تعيش جسد بلا روح
لأنه خد معاه الروح
هوى الإمام
ليست هناك تعليقات:
إرسال تعليق