عمر الوشوش م تبقي تاني نفس الوشوش
لما القلب الأنانى يسلم لقلب تانى ميعرفوش
وإللي كان قريب مكنش طيب ولا كان جميل
باع ف لحظه من الزمن بحبة قروش
كان مجرد حبة دهان علي وش بويه
متذوق بخيال حنان وفوله صويا
والشَعَر إللي بان علي كام ضفيره
لا عًمرُه كان طبيعى ولا كان صناعي
كان أصله باهت وباروكه عِيرة
إوعاك تشيل هَمّ خرطوش النجاه
ارمى وراك كل إللي سابك بدون دواعي
ولا إللي هَدّ حيلك من أي إتجاه
سيبك من أى واحد كان رفاعي
خليك هجومي وإنسي تكون دفاعي
طول م إنت ماشي ف السليم
يبقى أكيد قررت متكونش إندفاعى
واوعى تقبل عذر من واحد لئيم
ولا أي حد يحطك م بين سين وجيم
ابعد عن أى حد يحطك ف خانة خناق
مهو لو كان مكانك وحس بمرارك وداق
مكنش يوم هيسيبك وهيكون لك رحيم
مسير الأيام تجيبه بَعد بُعد الجفاء
وإللي شاف يوم ألامك وقرر يدوس
ويزيد من جروحك وسابك تغوص
هو دا الشيطان بعين الغباء
بس ياريتك تتعلم شوية دروس
سيبك م إللي سابك ع المشاع
وقرر يروح لسكه مفيهاش وداع
بوجه باهت ووش تانى كان عَبوس
،،إيهاب السقا،،
ليست هناك تعليقات:
إرسال تعليق