بور سعيد
(الشاعر رضا البوشي )
بور سعيد
تلات غربان مكتوب على وشهم هلافيت
حبه جراد شايله على كتفها الطواغيت
اتجمعو في في ليله على شعبها الجبار
مصنع رجال اتولد أبطال ولا العفاريت
كل حيطان الشوارع
صبحت في يوم ديناميت
حتىّ الولاد الصغار
عيونها تحب الحياة وتعشق التوابيت
شوارعها دم والحزن غير وشوشها
عصافير مقصوص جناحتها في كل بيت
صوت الجماجم مع صوت الأذان طالعين
في سته وخمسين
عيال بلون الورد على النهار زاحفين
لمت الغربان خيولها واتفتفت فتافيت
وقف التاريخ على بابها وطارت الحواديت
قصص بتحكي عن الثورة وعن الثوار
عن الشهيد اللي فتح في
العتمه الف نهار
بكره الايدين تتمد وتعلي في البنيان
قلوب بتزرع ورد متغمزه ألوان
والطير فوق السما فرحان
ولا يعرف جناحه السجن ولا السجان
كل الأيادي العفيه بتلعب في عبها الفرحه
ولضحكتها الشقية كل البشر عاشقة
الشعر غنى في حبها ورقصت الأناشيد
قمرايه وسط عيالها
جنه في ليله عيد
وإن سألوني عن وطني انا مصراوي
انا عريسها وبيتها وغيطها
ودمي اللي سال على أرضها
يطرح مكانه ايادي سمرا مكتوب
عليها بور سعيد
ليست هناك تعليقات:
إرسال تعليق