( الحرامي بسرقته ) م/عبالحميد سالم
قال للحرامي تحلف رد وقال أحلف يا بيه
بس كان الأولى تسأل إنت يا ابنى سرقت ليه ؟
كنت هاحكيلك دوافعى وأى حكم أنا راضى بيه
قال طب لخص كلامك دا الرول فيه 100 قضية
وانت باين من علامك أن ظروفك م كنتش هيه
رد وقال تعليم إيه جنابك والدنيا كلها حاطة عليا
قالوا الشهادة ف ايدك سلاح قمنا ذاكرنا وبكفاح
وصحبى خدها من قصيرها وقال أنا قدوتى صلاح
وبسم الله بقيت انا عاطل وهوا عيشته بقت براح
كلمته يمكن يرأف بحالى قاللى متسيبنى ف حالى
انت عايز تاخد كل حاجة هوا انت واحد من عيالى
وابويا قاللى شق طريقك دا علامك ضيع كل مالى
وعلى القهاوى والنواصى كان تجمع كل العاطلين
جيل المجتمع عليه قاسى طب ياكل ويشرب منين
غير بسرقة بتوع الكراسى اللى بسببهم مطحونين
مع إن كلامك ده صحيح بس القانون ف صفهم
وعشان أكون معاك صريح غصب عنى هاحكم لهم
مش قالوا الحرامى بسرقته ولا نقول إسرق زيهم !!
بقلمى م/ عبالحميد سالم
ليست هناك تعليقات:
إرسال تعليق