---- #سلسلة-#كان-#زمان
---- إهداء الى أبي
أبويا بيقلولوا يا عمده
من زمن فات
مع انه كان راجل فقير
مش عمده بالتعيين
دا ضمير صاحي
في كل الساعات
كان على أقل حاجة
ممكن عليها يبات
بس كان ف شبابه
تقولشي ابن بشوات
علمني أمانة وشرف
ونكران النفس والذات
عاش في زمن كله
الناس لبعضها سندات
يتقاسمو لقمتهم
حتى ولو قُتات
كان كل ثقافتهم
يحافظوا ع الأمانات
والشرف كان عنوان
ف الرايحات والجيات
كان مرة كنت مع صحبي
ف الغيطان دايرين
بنلعب بأبسط حاجة
ومين اللي زيكم مين
وكنا من قلة الاكل
ف الوقت ده جعانين
اتفقنا نشوي دُره
هوا كان فيه غيرها يا عين
رُحنا غيط صاحبي
جبنا دُرة كل واحد اتنين
شوينا الدُرة وكلنا
وكنا بيها مبسوطين
ف اخر النهار روحنا
واحنا فرحانين
أبويا عِرف وقالي
يا خاين ..يا قليل الدين
لاش تسرق من جارنا
من زرعو يا ابن ستين
قلت يا ولدي دا كان ابنو معايا
دا احنا مخدناش الفدادين
قالي ملكش حق تاخد
من غير ميعرف الوالدين
وحرمني من العشا
وسحلني وضربني كفين
وربطني ف الوتد
جمب عجل ومعزتين
وقال لأمي اوعى
ولا لقمة ولا لقمتين
قالي عشان تتربى
والاوضة كانت ضلمة
قبل الكهربا بسنتين
ولو ما خالي سيد
الله يرحمو امييين
حرَّرْني من قيودي
وقاللي خليك امين
ومن ساعتها ممكن
مقصر ف بعض امور الدين
ولكن ف الأمانة
شاربها من أبويا زين
وشبعت على طبليتو
وعيني ما راحت
أبدا شمال ولا يمين
يا رب يرحمك ياللي
علمتني من عرق الجبين
رمضان محمد محمود
ليست هناك تعليقات:
إرسال تعليق