.💓"راجعين لبعض تاني"💓
سجال دويتو بين الشاعرين
أ. صفاء الخواجة
م. محمود الحريري
------------------------------
صفاء
ليه راجعلي بالاماني
بعد م الزمان سلاني
والسنين فاتت و عدت
والمكان مبقاش مكاني
محمود
أيوه راجع بالأماني
لاجل اعيد الود تاني
ومهما طال بينا الزمان
عمرى مانسيتِك ثواني
.......
صفاء
ليه عايزنا تاني نرجع
هو بعد الجرح ينفع..
نمسح الدموع وخوفنا
ونبتدي تاني الحكاية
محمود
أيوه راجع راجي صفحِك
وبإديا أداوي جرحِك
وامسح الدمع في عيونِك
وازرع الأفراح ف قلبِك
........
صفاء
لأ ياغالي. قصدي
ياللي كنت... غالي
كل حاجة جوه مني
والهوى. أرضي وسمايا
محمود
قلبى مشتاقلك ياغالية
ياللى طول عمرك وفية
جوه قلبي عاش هواكِي
لسه غلاوتك زي ماهيا
.......
صفاء
عمر فات وليالي وإحنا
ف البعاد دوبنا روحنا
بعنا. دوحنا وكل بوحنا
وانتهت بينا الرواية
محمود
الظروف باعدت مابِيْنَّا
والبعاد زَوِّد جراحنا
بس مهما البعد طَوِّل
عمره مايفَرَّق قلوبنا
.......
صفاء
إنسى .ويلا بينا نمشي
نطوي كل حنين وننسى
لو بإيدي ماكنا.. ضعنا
او سمعنا..للوشاية
محمود
مستحيل عن بعض نبعد
واحنا دايماً بينَّا موعد
ولو سمعنا للوشاية
كان الحب يسيبنا ويبعد
........
صفاء
قسمة ويا نصيب اخدنا
لسكة كانت مكتوبة لنا
هان ودادنا. وحزن جانا
بالفراق .كتب النهاية
محمود
اللى مابينَّا قدر مكتوب
ونصيبنا مفيش منه هروب
ولسه غرامنا جوه قلوبنا
وقلبى ف حُبِّك دايب دوب
....
صفاء
مش هفكر .مش راح اسأل
ليه وإمتى وكان وفين
أسئلة تايهة..وغريبة
كلها..ملهاش إجابة!!!
محمود
متسأليش نفسِك كتير
أنا لسه بَحِبِّك وبَغِير
وياريتك تقبلى وتعودي
أنا راجع متفائل خير
وهاجاوبك على أي سؤال.
من غير تأليف أو تحوير
بس ياريت قلبك يصفالى
وانا هاثبت لك..
إنى هاكون بهواكِ جدير
.....
💓بقلم❤️
أ. صفاء الخواجة
م. محمود الحريري
ليست هناك تعليقات:
إرسال تعليق