جبت كام فى ثانويه !
ايوه انا عمرى ما فتحت كتاب
ولا بعرف اتفلسف فى الجواب
ويمكن كبرت وبقيت شاب
ولحد دلوقتى سؤالهم بيرن فيا
هوه انت جبت كام فى ثانويه!
جعلو قيمتى رقمين فى الميه
وهى عمرها ما كانت برقمين
يمكن مطلعتش ضابط بنجمتين
ولا دكتور ببالطو وسماعه
مش هقول ثانويه خداعه
ولكن هقول كلمتين
انا يمكن ساعتها معرفتش اجاوب
والكل فى وسط لمه قاعد بيعايب
وكلمتين طايرين ف الهوا اصله خايب
يمكن ساعتها عجز اللسان
لا كنت خايف ولا جبان
ولكن الرد بالفعل له أوان
ودلوقتي بس جه أوانه
بكره إللى كنت عايش علشانه
اتحقق بشركه وبملاايين
بناها المهندس إللى قالى زمان
انت مين !
دكتور يتمنى بس انى اشاور
والبنت إللى سابتنى علشان أساور
والخمسه سته إللى عايبوا زمان
كلهم يتمنو بس لو نتجاور
حكايتى مع ثانويه كانت البداية
اولها خايب اخرتها نجاح ملوش نهايه
كل سطر يزيد ف الحكاية
بيكتم معاه صدى سؤالهم جوايا
هوه انت جبت كام فى ثانويه!
Nourhan Fouad
ليست هناك تعليقات:
إرسال تعليق