كلنا واحد
الشاعر / رضا البوشي
احنا نسيج الوطن جوة المحن واحد
بنحب كلمة مصر وبنعشق الواحد
مايهمنيش انت مين ولا حتى ايه لونك
كل الوشوش تحت جناح الوطن واحد
انا الخاشع في محرابي
لحد العصر
انا الغرقان في صلواتي
بصلي وادعي لمصر
انا مينا اللي عايش في السيدة زينب
وأنا الحافظ لسورة ستنا مريم
وأنا المجنون بحب ست العصر
نفس الليالي الحزينة والدموع واحده
ونغني نفس الغنوة لما ييجي النصر
فاكر المريلة وفاكر جيران سيتي
عمريش سألت مين مسلم ومين قبطي
وكنت فاكر تريزا واحدة من بقيه عيلتي
حلوة الضحكة البريئة لما كنا صغار
و الصرخة طالعة بجد لما تشب النار
عدت شهور علينا وكانها أعوام
كبرنا في حضن بعض
لا غيرتنا المدن
قافلين علينا بيباننا خايفين من ضحك اللئام
سهران في حضن الوطن والسهره صباحي
احمد ومينا جمب بعض فوق الحدود
حتى السلاح صاحي
في ناس حيلتها بس حب الوطن
مبتسمين وهما في آخر الصفوف
وناس ريحتها بالملايين
هلافيت فاكرين ان الوطن
خزنة وشوية حروف
انا اللي مصر تعبت فيا
وشافت فيا الويل
و كبرتني وبقيت معروف
زي النهار والليل
وشربتني من نيلها احلى مية نيل
و هواها يجري في دمي زي النسيم والخيل
وعلمتني كيف اتكلم وميتي اسكت واقول
ورسمت جوايا خط خلت حياتي مسطرة
و هواها ده قنطرة السمرا بنت الأصول
جوه المحن كتير قالتلي
احمد وجرجس فوق أرض الوطن اخوات
مصري انا منَ أول الملكوت ولحد يوم الممات
حتى رصاص العدو ما قدر يفرقنا
احنا بحرنا واحد في الفرح والمحنه
جمب الكنيسة لحد الفجر
كلنافي انتظار بكرة
وبكرة أخضر زي خضار الأرض
والكل واقف يحصد الزرعة
كلنا واحد
ليست هناك تعليقات:
إرسال تعليق