أحدث ماكتبت اليوم
20/8/2021
قد الدنيا
*********
قد الدنيا حتبقي يابلدي
بس الناس يبقى لها ضمير
نبنى نعمر بإيدين ولدي
وخيرنا مايبقاش للغير
بالصبر والهمة دي عندي
وعلى سمعة بلدى أنا بَغير
مصر الغالية تاريخك وردي
فن حضارة وإسم كبير
أنتِ الدنيا وقد الدنيا
ونيلك كوثر خيره وفير
أم الدنيا ورايتك عالية
وناسك راضية غني وفقير
ياما صبرنا وياما قاسينا
وربنا عالم بينا بصير
يزيد الهمة ونفرح لمة
ويرزقنا كما رزق الطير
قد الدنيا حتبقي يابلدي
بس الناس يبقى لها ضمير
سنين نتحارب بره وجوه
وفيه رجاله عرقها عبير
بتصون أرضها ومعاها القوة
وإللى مساعد رب نصير
مصر جديدة ودولة رشيدة
حننورها ونعمرها أحسن تعمير
طول ما إيمانا أسمى عقيدة
حنعدى الصعب وحنطير
فوق فى العالي وليلنا يلالي
ويحلى الغُنا فى الفرح كتير
قد الدنيا حتبقي يابلدي
بس الناس يبقى لها ضمير
وجند الله يحموكِ يابلدي
وإيد مع إيد يحلى التعمير
وقد الدنيا
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق