أنا شاعر عامي وفصيح
مولود على كتفي حكاوي
منقوشة من قلب الريح
بتنطط زي العصفور
وبلقط رزقى مع إني كسيح
و بزعق وأجعر على حالي
وأحلام صبحت قشرة صفيح
وبغنى لبكره الملفوف على خده النور
يسمعني كروان بيصيح
وبحب وأتحب وأمشي على ممشى العشاق
وأشرب كاس المجاريح
غلبان وأتمسكن وعشان أخد حقي
ألبس توب التماسيح
على ضهر الليل تمشي رجولي
وأتهد من كتر اللف
وبكون ورداية دموعها عالخد تسيح
شمعاية انطفى نورها محتاجة حبة تفاتيح
ولسانى مدب وعلى طرفه ساكنة التسابيح
وضلوعي مليانة أحزان شايلاني
وشايل جواها التفاريح
والعتمة محاوطانى ومكلبشة أيامي
علشان أرجع تاني زي الور أفتح
محتاج حبة تصاريح
بكتب عن أمى إللى النور ف عنيها
بتنور كل المصابيح
عن بنت شقية فى ضفايرها
بتتمرجح كل المراجيح
عن شريانى المتقطع فى الغربة
عن جسمي المحتاج تشريح
وأرجع تاني طفل لسه بيحبي
قلبه ع القشرة إنسان بصحيح
لما حبيبتي تطبطب على كتفي
وتفطرني بإيديها الشقيانة حبة
تواشيح
بقلمى/ رضا البوشى
ليست هناك تعليقات:
إرسال تعليق