حكايتي مع العصفورة 3
وحشتيني
يمين بالله وحشتيني
وحشني الحب فى عيونك
وحشني السحر فى جفونك
وحشني طيف على الميّه
يلاغيني ويغريني
وحشتيني
يا عصفورة ..يا غندورة
يابنت الإيه .. يا مغرورة
أنا سواح يا جنيّه
سافرت كتير
وطول عمرى
مابين الشط والميّه
وشفت كتير
صبايا ع الشطوط نايمة
عيونهم للرفيق هايمة
وخوفي من غضب ربي
غضضت الطرف بعنيا
وبعد السير وترحالي
رجعت لبلدي ودياري
خليٌ البال
وكام موال بيحلالي
أغرّد للطيور وحدي
وأمسح بالزهور خدّي
لدمعة نازلة من عيني
وحشتيني
ومن يومها وأنا حيران
وأحكي اللوعة للشطآن
وأقول يمكن تنسّيني
وحشتيني
وجيتيني يا عصفورة
يا بنت الإيه يا غندورة
دخلتي جوه بستاني
بكلمة حلوة مشهورة
سمعها قلبى طار مني
وطيرتي معاه يا سنيورة
ومن يومها وأنا بأغنّي
وأشكي للطيور همّي
ووعد جميل على اللقيا
ومن همّي ينسيني
وحشتيني
أنا جايلك يا جنّيّة
يا بنت الإيه يا حورية
معايا زادى وزوادى
معايا الحنّة بإيديا
وريحانة وعود ياسمين
وكام وردة مندّيّة
وتوب أبيض
معاه طرحة
وتاج فيه ماسة ملالية
وأمد الإيد
لعمر جديد
وكل الناس تهنّيني
وحشتيني
رفـعـت مـحـفــوظ -الإسـكـنـدريـة
ليست هناك تعليقات:
إرسال تعليق