😭😭 قتلولي الحلم 😭😭
_ ما تقولي يا عم زعلان من ايه
~ يا ابني اتسهل الله لا يسيئك
امشي بعيد خليك في طريقك
_ والنبي لتقول
~ راح اقلك ايه واعيد لك ايه
الواد عبود خلص جامعه
ودي كانت ليا أمنيه
والواد من صغره عايش يحلم
ويقول راح أكون شخصيه
وهكون دكتور وأعالج كل المديريه
وأقوله احلم علي قدك يا عنيا
_ طيب يا أبا .. افوكاتو كبير
واكون مشهور زي الباشا مرتضي منصور
~ قلت له اهمد
أنا عايزك تحلم حلم الغلبان
_ قال بتقول ايه
هو الغلبان له حلم كمان ؟
~ قلت له حلمه يبقي انسان
ميشفش الظلم في وطنه يبان
بكى ابني وقال :
الحلم ده يا ابا ملهوش مكان
شايف الغلبان .. علي طول متهان
طب اقلك يا ابا أنا هعمل ايه
~ راح تعمل ايه ما تقلي عليه
_ هعمل ثوره علي سيدي البيه
والم فلان واجيب علان
وأقول للكل يا ناس فوقوا
ساعدوني احقق احلامكوا واحلامي
وفي ليله يا ولدي
اتزق الباب .. زوار الليل بقوا قدامي
صحوني مفزوع من اوهامي
وإبني خدوه
معرفشي ياولدي فين ودوه
تعبت أدور علي ابني
وأبوس الأيد ولا لاقي جديد
الدنيا اسودت قدامي
وحلمي خدوه
حي وسجنوه
قتلولي أملي وأحلامي
خالد سعد
1/9/2020
شكرا لسيدة الحرف والقائمين علي المجلة لتوثيق النص
ردحذف