يا ام طرحة وجلابية
الشاعر / رضا البوشى
مفتتح
انا وانت توامين طايرين
على بوابات الرحيل
لا يمنع لقانا لا حجاب ولا ستارة
هأفصل أحبك لآخر توتة ع الساقية
لآخر دمعة جوايا
لآخر ضحكة في الحارة
يا ام طرحة وجلابية
عايزة إية م الدنيا دية
يسرقوكي ينهبوكي
وانتي زي الريح معافرة
الزمن رايحَ ياشيخة
والآبالسة
وإنتي زي الفل واقفة
ميت حصار ولا في مهارودة
فاتحة قلبك وف مراكبك
الف شمعة
الطوفان والزلازل و العواذل
كله راحل
التتار والمغول
كله عدي
وفي هواكي
كام مليون مجنون النهاردة
يا ام طرحة وجلابية
عايزة إية م الدنيا دية
عايزة كيلو طحنية سادة
وحاجة تستر معدتي
١٠٠جرام هنا وسعادة
مناديل تنشف دمعتي
عايزة حلة وكام بابور
يحرقوا الناس القوية
يا أم طرحة وجلابية
عايزة كيلو حب صافي
فول سوداني حمص علي سمسمية
ناس بريئة بتقول عوافي
وربع وقة طيبة تهدي الإنسانية
نرجع بشر وكل اليالي تبقي بنفسجية
يا ام طرحة وجلابية
عايزة كازوزة ملبس آيس كريم
ناس قلوبها أبيض م الصباح
عايزة ايد بتحسس على اليتيم
وعايزة كريم ينضف كل الجراح
وكام علاوة وينصلح حال المهية
ياام طرحة وجلابية
عايزة بقرش توفي وبمليم حلاوة
وأسمع ثومة في الف ليلة وليلة
عايزة أستيكة بتمسح الغباوة
والخلايق تبقى راضية في كل عيلة
نرجع تاني للسمع والأغاني الكلثومية
يا ام طرحة وجلابية
عايزة سكر يحلي أيامنا الكئيبة
وناس بسيطة أبسط م البساطة
عايزة قصر لكل الخلق الفقيرة
وكلنا نقب من تحت البلاطة
عايزة أحذف من قاموسنا كلمة محسوبية
يا ام طرحة وجلابية
احنا بنعاهدك ياغالية
إننا نفضل ولادك
صوتك الحر
إمتدادك
شمسك المرفوعة عالية
فوق مدارك
إحنا بنعاهدك ياغالية
في الشدايد نكون دراعك
رفرفي شمسك علينا
وافردي في الكون شراعك
واقفة فوق الجرح تبني
وبتبتسم
إحنا طولك
إحنا عرضك
بشرتك
حتى نخاعك
احنا بنعاهدك ياغالية
بالمحافظة والمواظبة
على مقامك
وإبتسامك
السعادة تكون جناحك
والأمل اللي شاب من ركنتة
يرجع يدب بخطوتة
يطرح نهارك
فوق كباري العشق
إنتي أحلى سمسمية
يا أم شال أبيض قطيفة
وطرحة تولي
م ا لتتار للمغول للخلافة العباسية
كلنا مجانين في حبك
يا بهية
ليست هناك تعليقات:
إرسال تعليق