عطشاااااااااااان
======
شربة ميا ياناس راح اموت
لو بدولار أو 100 سحتوت
نشفت والله عروقي وجفت
من أبي أحمد والجبروت
_______
رحت لمجلس أمن أقاضي
طنش قاللي ياعم أنا راضي
روح دور لك على كام بير
أصل الفيتو بتاعك فاضي
-----------
مجلس أمن ياناس بيطاطي
للي بايعني أخويا الواطي
وكمان لوبي يهودي حقير
دوره سياسي نجس مطاطي
-----------
إبني حبيبي يموت عطشان
شارب ذل كمان حرمان
واحنا بنرقص جنب الحيط
والدربوكه من الجرذان
-----------
عمر المصري عزيز مااتهان
عمره ماكان مرعوش وجبان
رافع راسه سلاحه وفاسه
يزرع بيه مليون فدان
_________
هاخد حقي وهارفع صوتي
مش هاستنى جنازتي وموتي
لما أموت مرفوع الراس
أشرف لي من ذل سكوتي
==========
بقلمى سامح توكل أبوالسبح
ليست هناك تعليقات:
إرسال تعليق