إدفـيـنــــا بـلـــدى
إدفيـنا بلدي ياحلوه
فاكره ليالي زمان
عشقت فيكِ القمر
بينور الغيطان
عشقت فيكِ الشجر
بيضلل الحرّان
ياما سهرت بشطك
ومعايا ناي فرحان
وصوابعي تعزف نغم
بيسعد الخِلاّن
وصبايا تملا الجٍرار
من شط نيل أسمر
وتنادي من تحت طرحة
وتقول لي زِدنا كمان
..
ونيلـنــا الحلو لاسمر
كان عفي وشديد
لما يفيض ع الغيطان
الخير ساعتها يزيد
والطمي يكسي المكان
والكل يبقي سعيد
والأرض تبقي عفيّه
والخُضره ملياها
والفاكهه منظرها يفرح
من غير كيماوي ومبيد
...
وأهي دارت الأيام
ورجعت لِك تاني
لقيت شطوطك إختفت
زرعوها بمباني
والنيل في في أرضى حزين
كإنه بيعاني
والأرض تشكي همومها
من حالها غضبانه
والأرض تنعي بوارها
من حالها عطـشـانـه
تدعي الإله القدير
يقضي علي الجاني
..
آدي حكاية وطــن
كان يسحر الألباب
مسكوه شلة لصوص
خلّوا حياتنا هباب
ودمروا أرضنا
والزرع فيها خاب
عملوها للجولف ملعب
وملاهي للأحباب
وان حد منا نطق
منين نجيب قوتنا
يردوا هـات من اميريكا
من غير تعب وحساب !!!
رفعت محفوظ
ليست هناك تعليقات:
إرسال تعليق