شوية غرز
يا ملضمين الفتل
أوعوا يصيبكم هزز
أنا جرحى أبو العلل
محتاج شوية غرز
حبيت وكات غلطتى
وجزاتى من ضعفى
وأنا قلبى كان أزمتى
وغرامى كان ضعفى
ينفع لجرحى دوا
لو جرحه كان لحبيب
ولا كلامى فى الهوى
وعاجز دواك يا طبيب
وقلبى خلاص أنقتل
يا ملضمين الفتل
ياليل حزنك يواسينى
نجوم تسهر بدمع العين
أتارى مكتوب على جبينى
دموعى تنزف سنين وسنين
تعانى غدر حبيب بعنى
بأرخص سعر فى مزاده
ناوى أمته يا جرح تودعنى
ده كل جرح وله ميعاده
وأنا جرحى ميعاده مفتوح
بيجدد وجعه بالثانيه
عايش وياه حلاوة روح
بعانى معاه بقى يادنيا
قالولى أطبة الأحزان
جراحك والله مالها زي
تعانى الأه و يا وهلان
علاجك عندى هو الكي
يمكن ساعتها يكون دبل
يا ملضمين الفتل
أوعوا يصيبكم هزز
أنا جرحى أبو العلل
محتاج شوية غرز
كلماتى إبراهيم الحداد
ليست هناك تعليقات:
إرسال تعليق