( فكر٠٠تلاقيها٠٠صح)( الرصيف الناعم)
لَقتها واقفة عالرصيف
ودمعة حاضنة إيديها
وبتقول ياحبايبي
ولو رغيف٠٠
قربت منها
جالي إحساس
قلبها نضيف٠٠
قولتلها صباح الخير
إيه حكايتك؟
إيه بدايتك ؟
قالت،إبني إللي
حتة مني مرعاش سني
وعشان مراته
رماني عالرصيف٠٠
قولتلهُ، يابني
وحياتي عندك
متسبنيش مرمية لوحدي
عاملني زي أي ضيف٠٠
سَكني جنبك
أشم رِحتكْ
في الجايه والرايحة
حب الأم يابني
حقيقي مش زيف٠٠
مش طالبه لبس
ولا فرش جديد
هي لقمة مش اكتر
تسند قلبي الضعيف٠٠
ونظرة منك،
تغنيني عن برد الشتاء
وحر الصيف٠٠
قال، البيت ميسعش
إتنين
هي ام عيالي
بخاف عليها من الطيف٠٠
وانتِ ياأمي ،
مرضك طَوِل
والديانة على رقبتي
زي السيف٠٠
كلامه شَقني نصين
مصدقتش ده ابني
نور العين
خرجت اجري لوحدي
ودموعي عالخدين
ومش شايفة
زي الكفيف٠٠
دي حكايتي
ودي نهايتي
ملقتش سكن
غير الرصيف٠٠
اسامه عبد العال
مصر
ليست هناك تعليقات:
إرسال تعليق