الجيران
*******
الجيران آه لو حبايب
يبقوا أحسن م القرايب
يلحقك فى اى شدة
حتى لو كان سهم صايب
فى الفرح تلاقيه أخوك
ويبقى له فى الفرح نايب
الجيران فى الصحبة خير
ولأهل بيتك راح يغير
تنده تلاقيه يطير
زى جندى راح يحارب
الجيران عصبة ولمة
فى المساعدة اقوى همة
لو مناسبة او مهمة
زى اخوك لو اخوك دا غايب
م الجيران ناس فيها طيبة
متلاقيش فيها اى عيبة
يرد عنك لو فى غيبة
تعيشوا اهل وفيه نسايب
والجيران اه لو حبايب
يبقوا احسن م القرايب
********
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق