"أنا شفت غزال"
---------------------
أنا شفت غزال مرة معدي
وندهت عليه
قلتله ماتهدي عشان خاطري
ومستعجل ليه
ولمحته بيضحك وغمزلي
من طرف عنيه
ولقيت قلبي بسرعة بيجري
ويتعلق بيه
ولقيته هو اللي تملي
كنت احلم بيه
وف كل مكان كنت بادور
علشان ألاقيه
******
ولقيتك ياغزال قدامي
وف لحظة اتسمرت مكاني
انت اللي باشوفه ف أحلامي
وجمالك لخبطلي كياني
أنا عاوزك تسعد أيامي
وانا هاملا حياتك بحناني
ونخلي غرامك وغرامي
من أجمل ألحان وأغاني
*****
حبيتك ياغزال وعشقتك
من أول مالمحت خيالك
والقلب رقص لما قابلتك
وخطفته بحسنك ودلالك
خليني أعيش جوه ف قلبك
دفيني بحبك وحنانك
----------------------------------
بقلمي؛؛
م/ محمود الحريري
من ديواني " كان لقلبي بيت"
ليست هناك تعليقات:
إرسال تعليق