🌹آه .. يانفسي🌹
تعاليلي بسرعة وأنا أوصفلك
واشرح لك برضه وراح أدلك
بالراحة وبشويش .. وتفاهم
من غير ما اضايقك أو أذلك
***
إيه إللي مغير.. أحوالك
ليه ناسية الضحكة وطعامتها
ليه خايفة ودايما قلقانة
والحلم ف ليلتك مفارقها
***
مش هقدر الومك أو أعاتبك
ولا عايزة أهدد وأعاندك
وسؤالك لازم راح أجاوبه
وأريح بالك.. لغلاوتك
***
ياقريبة وباعدة. بأفكارك
والتوهة تونس خطواتك
احكيلي وفضفضي وارتاحي
إيه إللي مكدر نبضاتك
***
مش عارفة تعيشي وزهقانة
من كل قرايبك وصحابك؟
والوقت يعدي تقيل خالص
مش لاقية الراحة مع أحبابك
***
طب ليه مش عايزة تصالحيها
وتطاوعي تقلب لياليها
دي الدنيا ودايما تلاقيها
الناس على كيفها. بتغريها
***
ماتنافقي أمورها .كمان طاطي
أو جاملي . وسيبك من جَدك
واعملي مش فاهمة أو اتغابي
ح تلاقي الكل واقف جنبك
***
تعباني يانفسي وبتداري
ف آلامك وف حزن أيامي
وبتقسي عليا. وبتعافري
اخرتها بتمرضي وتعاني
***
اسمعي لكلامي المرة دي
واتعاملي أونطة بإدارية
راح تعلي يحطوكِ حواية
على راسهم ولاتبقي غبية
***
آه يانفسي وروحي التعبانة
عودتك على صدق النية
وزماننا ده عايز مدادية
وبيعشق كتر الملاغية
***
اصفي له وهو ح يصفى لك
عديها ياروحي.. وعدي لها
وعيشيها بكل.. الحنية
تأمني غضباتها وزلازلها
***
🌹بقلمي/ صفاء الخواجة 🌹
ليست هناك تعليقات:
إرسال تعليق