كتب الشاعر/ مجدى الشيخ ¥أهو فات بكره ¥

.... أهو فات بكره....
أهو فات بكره وييجي مية بكره
وماجاش بردو حبيبي يابكره
خايف ألا يكون دا نساني
أو يمكن ضيع عنواني
وبقيت أنا بالنسباله ذكرى
روح له ياشوق وماتشغلهوش
غير بغرامي وماتسيبهوش
واوعى ياشوق ترجع وتقوللي
 زي امبارح مالقتهوش
ونعيد نفس كلامنا امبارح
مع ليل قاسي وناسي وجارح
وتقوللي حاقولك على فكره
خايف ألا يكون دا نساني
أو يمكن ضيع عنواني
وبقيت أنا بالنسباله ذكرى
قوللي ياقلبي حتعمل إيه
حتعمل إيه؟
لما عينيك ح تيجي في عينيه
حتعمل إيه؟
قوللي ياقلبي قوام طمني
دانا مشتاق له ونفسي أشوفه
و الأحلام بدأت ترسم لي
خياله معدي باكلم طيفه
ولقيت نفسي باكلم نفسي
وبكدب وبداري ف يأسي
وباقول لأ يمكن ييجي بكره
آه ياظنوني وإيه آخترتها
وبعد غيبتها
آه ياظنوني
شوفوا بقى مين يعرف سكتها
أو باب بيتها
 ويودوني
آه ياظنوني خلاص مش قادر
مين دا اللي ينسيني حلاوتها
من بعد ما شغلتلي عيوني
وانطبعت في القلب صورتها
مين دا اللي ينسيني حلاوتها
مانطبعت في القلب صورتها
نفرض بقى ياظنون سيبتوني
وماشغلتش عيونها عيوني
كنا حنقعد مع مين بكره؟
.... بقلمي مجدي الشيخ....