🌹سجال
/ عفوا لقد نفد رصيدك🌹
بقلم أ. ناصر العوضي
أ. صفاء الخواجة
🍁🍁🍁🍁🍁
أ.صفاء
رصيدك انتَ ضيعته
بإهمالك..لاشواقي
مصنتش يوم حنان قلبي
ولا حققت أحلامي..
أ. ناصر العوضي
طب أشحن حبة و اثبت لك
حنيني و صدق اشــــــواقي
و لو قصرت فى حــــــــــبك
ترجع شحــــــــــــنك الباقي
أ. صفاء
مش ح اشحن تاني ولا أجيلك
كفاني زمان من تقصيرك
أنا ياما سهرت كتير ليلك
باتمنى النظرة دي من عينك
تهملني وتبعد .. وتعاند
وخلاص مش ح أسمع مواويلك
أ. ناصر
الشبكة ما بينا مقطـــــــــــوعة
و لا كلمة ما بينا مسمــــــــوعة
سامعاني بارن و ســـــــايباني
يا شاريكي و انت البياعــــــــة
أ. صفاء
عارفاك أنا سامعة لرناتك
وأنا فعلا بايعة لأيامك
متظنش ح أفتح واتكلم
باي باي لسنينك وزمانك
أ. ناصر
مش هاقفلها السكة معاكي
و هارن و اعيد رن وراكي
و هاحول خط و مش هاشحن
و هاضيع فواتير عليك
تليفوني هايفضل مفتوح لك
و ما فيش غير نمرتي هاتبوحولك
و اذا كان مشغول خطك عني
مش هايأس و انشغلي براحتك
الخدمة هاترجع من تاني
و نرجع احلام و أماني
و اذا كنتي مصره على بعادك
انا هارمي و هاكسر تليفوني
أ. صفاء
اصرارك كان فين.. ياناسيني
ده أنا ياما ناديتك.. بأنيني
دلوقت بغلطك ..بتبوح لي
وبتطلب تبقى لي.. دليلي
راح أفكر.. وأديلك فرصة
لو صادق وبجد.. شاريني
وإن هُنت عليك اوعى تلومني
ولا تطلب صفحي ولا تجيني
أ. ناصر
الفرصة اكيد فرصة عمـــــــــــري
و يا ريتك قلـــــــــــتي من بدري
و رصيدي اكيد هايزيد عــــــندك
مش هاشحن و هاسيبك و اجري
أ. صفاء
أنا عارفة وواثقة بألاعيبك
مش عايزة تجيني ولا أجيلك
آه يا شيحة زماننا مايستحمل
ملاعيبك ولا بيع لضميرك
أ. ناصر
و لا بالعب و لا كنت ابو لمعه
و عليٓ اوعي تطلعي سمعـــه
انا بس باحــب أطير و أسبح
من يوم السبت الى الجمعـٕه
اسعدني حوارك يا خـــــــواجه
و بقيت جنبك انا و لا حــــاجه
انا هاشحن دايما و هاجـــي لك
و هانكتب شعر في ميت حاجه
أ. صفاء
العفو.. يا أستاذي الغالي
أسعدني سجالك وكلامك
وسجالنا الجاي يكون مبدع
والكل ح يتمنى سجالك
🌹بقلم/ صفاء الخواجة
بقلم/ ناصر العوضي🌹
ليست هناك تعليقات:
إرسال تعليق