سجال
😂 أخد الشر وراح😂
للشاعر م. محمود الحريري
والشاعرة أ. صفاء الخواجة
🍁🍁🍁🍁🍁🍁
صفاء
يابجاحة عينك وعمايلك
متسهوك متقولشي ممثل
ف الراحة والجاية بتتمسكن
وفاكرني غبية ومش فاهمة
كان غيرك اشطر... وكسبني
وياخايب ابعد يا منيل
محمود
جايبه لنفسه لأنه مُهزأ
سايق في عمايله اللي تزهق
متنيل على عينه ومسهوك
بيمثل وكلامه مزوق
إديله على راسه ولايهمك
ماهو خايب ولايقدر ينطق
صفاء
ينطق مع مين ويحاور
ده عبيط وكلامه مهرتل
وبزغرة عيني يروح مايل
وبيرعش مني المتبهدل
محمود
من كتر عمايله أهو اتبهدل
ولاعاد بيحوَّر ويمثل
ويبص وراه لما بيمشي
لو لمحك تلاقيه مستعجل
يستاهل كل اللي حصل له
ومعدش هيقدر يتحنجل
صفاء
بسلامة والقلب داعي له
كان لازم نكسر جناحاته
ونخلص ناسي وأحبابي
من كل غلاسته وبصاته
محمود
خليه يمشي ويبعد عنك
بس ياريته يكون اتعلم
لو فكر يتقرب منك
الشبشب على راسه يعلم
صفاء
أهو أخد الشر.. وراح
كان هَمْ خلاص وانزاح
لو فكر يتنطط تاني
مش هنسيبه يعيش مرتاح
محمود
مش ممكن ابدا هيفكر
ويحاول يتسهوك تاني
لو فكر يبقى بيتهور
يتبهدل فورا ويعاني
😂بقلم الشاعرة/صفاءالخواجة
والشاعر م. محمود الحريري 😂
ليست هناك تعليقات:
إرسال تعليق