"الطريق المسدود"
قصيدة باللهجة العامية
------------------------------
عمرى مانسيت إن قلبى
جرحه غاير من خداعَك
عمرى مانسيت إن عينى
دموعها نزلت من كلامَك
عمرى مانسيت إن حبَك
أصله كذبة من لسانَك
..........
كل مرة كنت تغلط
تيجى عندى عشان أسامحَك
كل مرة كنت تجرح
تحلف إنه مكنش قصدَك
دى الخيانة شئ في طبعك
والخداع يجرى فى دمَك
.............
د انتَ.. كل كلمة منَك
طالعة أقوى من البارود
إنتَ بِعْت بقلب جاحد
وجرحتنى وخونت العهود
والمسافة بينَّا بعدت
والطريق أصبح مسدود
مش هاسامحَك تانى أبداً
مستحيل أغفر واعود
--------------------------------
بقلم : م/ محمود الحريرى
ليست هناك تعليقات:
إرسال تعليق