كتب الشاعر/ محمد البريمي .. ليل وسهرته ..

شعر غنائى ..
(((  ليل و سهرته  )))
ليل  و  سهرته  بال و شغلته  .. أعمل  أكتر  من  كده إيه  ..

حب و  حبيتك حنان  و إديتك  ..  ورد وزرعته قطفته  ليه  ..

بعد الحب م كبر و  زاد   .. تنكره ليه من غير ميعاد  ..

و تقلب وش و تسوق عناد   ..  و ف يوم و ليله تلوم عليه  ..

         ليل و سهرته ..

إيه اللى جناه  قلبى معاك  ..  تغدر  بيه  ليه  و تبيع  ..

و تهد كل اللى بناه ..  بعد م شاف الدنيا ربيع

قلبى اللى حبك و صان ودك .. كنت ليه بتخون عهدك  ..

فين وردك    فين وعدك  .. هان عليك تعمل مواضيع  ..

        ليل و سهرته ..

بعد م شوفت الهنا وياك .. و تعيشنى ف حلم جميل  ..

جى تخدعنى بعد سنين  .. بعد  شوق و سهر  و ليل  ..

خساره يا قلبى ضيعت وقتك  ..  عشموك  و جابوا سيرتك  .

ياريتنى  م  سمعت شورتك ..  بعد  نكران الجميل  ..

        ليل و سهرته

العيب  عليك  يا هوى ..  كان  مالى و مال  الشوق

بتجدد عذابى  ليه .. هو حرام البال يروق  ..

ألوم عليك ولا ع الزمن  .. اللى باعنى  من غير تمن  ..

لا قلب حنين ولا سكن .. تايه م بين تحت و فوق  ..

         ليل و سهرته ..

بقلم الشاعر ..
محمد البريمى ..