اعياد أكتوبر
_________
هلّيت يا يوم عيدنا
تيجى فى مواعيدنا
خمسين سنة واكتر
وانت مواعدنا
كان أول الأسبوع
يوم سبت واحنا صيام
والفرح كان ممنوع
والناس صيام وقيام
كان لسه هزيمتنا
من كام سنة فاكرين
دقت طبول بيتنا
جرى ايه يا مصريين
من عهد فراعينا
بنفوت فى قلب النار
ننحت على قلوبنا
وعلى الحجر اشعار
وان كنت تجهلنا
اسأل علينا الدهر
احنا اللى من يومنا
رافعين رايات النصر
واسأل علينا الهرم
واسأل علينا الكون
مين اللى ساس الأمم
مين اللى كان فرعون
كان يومنا يوم مشهود
عبرنا جسر الهزيمة
ما عاد تحوشنا حدود
ما حد يوم هيعادينا
نصبنا جسر الكرامة
وعبرنا بحر الأمانى
وقلوبنا زى الحمامه
وتشد روحها الأغانى
قيادة من روحنا فينا
وقادة فى الدنيا صيتها
ميراثنا من عصر مينا
تفتت الصخر بإيدها
صه...يون صحا من خواره
عريان ما يدرى اللى فيها
لملم من الأرض عاره
وساب عاليها واطيها
بلّل من الخوف هدومه
جبان وسابت ركابه
والندل مين راح يلومه
وبإيه هينفع عتابه
خمسين سنة لسه فاكر
وشوش ولادنا اللى غابوا
وحتى صوت الحناجر
وناس على الكتف جابوا
شايلين رايات لو تشوفها
تسعد قلوب كات حزينه
من سينا حنّت كفوفها
والسعد ضلل علينا
ولا عادش خط الموانع
ولا عاد لصه..يون مكان
واذان على كل جامع
والكل لبّى الأدان
يا سينا زفى عريسك
شهيد بدمه رواكى
وهنى بالنصر جيشك
دايما مسدد خطاكى
رجعوا الجنود البواسل
بالفرحه والنصر ليكى
شايلين فى ايدهم سنابل
وورود تزين ايديكى
م الفرحة ساعة رجوعهم
الدنيا هلّت علينا
لا الدنيا قادره تسيعهم
ولا حتى فرحتنا فينا
وجرينا من عزم روحنا
نحضن ونمسح دموعنا
طابت من الشوق جروحنا
وقيدنا نورنا وشموعنا
الله عليهم جنودنا
فى الحرب حاضر وماضي
بالحق وابسط حقوقنا
ع الظلم سيفنا اللى ماضي
خمسين سنة بس عدوا
من يوم رجوعك يا سينا
لا نسينا ولا يوم هننسى
ولا يوم تغيب عن عنينا
شعر
عبد الرحيم على
ليست هناك تعليقات:
إرسال تعليق