ونفسي ف حرف ميكونش فرح مرة
عشان أنقش به على صوتي
حاجات مرة
عن الموت اللي
مشبعش من الأحباب
عن الفرقة اللي بتشت
بدون أسباب
عن الغنوة اللي كات ضلة
بطول الضحكة والأحزان
وعن بكرة اللي كان طلة
بتروي الحلم م الشريان
يا صوت كان حر علمني
أدوس بالحلم ع النسيان
وأعيد حساباتي في الدنيا
وف الممكن وف الإنسان
ويوم ما أغلب وتغلبني
هموم الدنيا ... أرسمني
على صوتك .. صداه لسه
بيهتف.. لسة أنا حرة
جلال ليه يومها أطاطي له
وأقوله نفسي أتعلم
بكا ميكونش له خبرة
ونفسي ف حرف ميكونش
فرح مرة
عشان أنقش على صوتي
حاجات مرة
***
وداع
وألف خسارة للباقيين
وداع يا أول الحاضرين
وداع يا أول الراسمين
خيوط الفجر
على الليل المعدي حزين
ما هو بدونك دموع العين
هتمسح حتى مجراها
هتفضل شايلة ذكراها
وتحفر فوق فضا الخدين
حروف إسمك شجن وحنين
وداع يا قلع ع الساري
ف مركب حور
بيهدي النوتي بناياتي
ف لحظة نور
يبَكِّي الموج على لحن الفراق
ويطول
لسان حاله إنكسار الحلم
والمعقول
أنا لازم .. أكيد بحلم
أكيد د ا كابوس
ما هو مش ممكن إني أقدر
أخطي وأدوس
على قلبي اللي علمتيه
يحس بأنّة المجاريح
ولا عقلي اللي رتبتيه
بِحس الصبر رغم الريح
يا أصفى من صفا التفاريح
أنا جوه الوجع محبوس
كيان ما أملكش فيه ذرة
ونفسي ف حرف ميكونش
فرح مرة
عشان أنقش على صوتي
حاجات مرة
* * *
يا موت واخد على خاطري
وخاطري تبلغ الراحلين
أهي أيام وراح تجري
ونتقابل مع الغاليين
ويومها أكيد عشان كنا
يا موت ... راضيين بأحوالنا
وبالمقسوم وبالمكتوب
وعارفين إنها أيام
وأنفاس مننا بتدوب
أكيد يومها يا ضلاية
في (شوب) الوقفة ضحكاية
هتهديني لمكان ضيك
وأجي لك أصل أنا زيك
بحب اللمة ... بس بعيد
بكون خايف يعدي العيد
ما أعيدش
عشان يمكن مبقدرش
أغش الحلم بالأوهام
وأكون ف أخر الآخر
وأقول للناس أنا قدام
ودا اتعلمته من غرسك
ومن فعلك ومن درسك
عن الحرية والأحلام
وقولتيلي يا واد يا أسمر
تخليك حر
بس تشور
وخد لك م الزمان الأغبر
بطاقة حظ وأحجز دور
ما يمكن وسط دي العتمة
ودي الغمة ودي الهوجة
يا واد تعدلنا العوجة
وتفتح لينا طاقة نور
ما هو ف الدنيا يا محمد
مفيش حاذ
ر من المقدور
وقلتي وقلتي ... قلتي كتير
يا دوب هنطق وأقول دا كتير
رماني الموت بحزن كبير
لقيت نفسي بقول نفسي
بقيت عمري أشيل درسي
ف قلب ع الوجع مفطوم
وعقل بينكسر ويقوم
ودمعة بتغلي مش حارة
ونفسي ف حرف ميكونش
فرح مرة
عشان أنقش على صوتي
حاجات مرة
ليست هناك تعليقات:
إرسال تعليق