(شَلضَم)
طلبتني..
كانت زوجتي ويايا
ولو بصت وقفشتني
ح تعمل ع المسا حكاية
ف قلت أسلم أكنسلها
والم الدور..
سألتني..
مين ب يرن؟
فضلت نص ساعة تزن
قلت صديق بيسألني
من امبارح على كارفور..
ردت.. وانت مالك بيه..
تكون مُرشِد وماعرفشي
وليه خايف ترُد عليه..
ساكت ليه؟
جاوبت ح ارُد اقولك إيه
ما قلت صديق!!
لمحت فعين مراتي حريق
خرجت منها لفظة ضيق..
قالت.. أوف..
ما بتبطلش عمرك لَف..
أنا حفظاك يا نور عيني
هات الإسم وريني
صديقك مين؟
ردِّيت.. إسم صاحبي
حسين..
قالت فين؟
نَتَشِت فجأة تليفوني
حاولت تفتحه ما فَتَحش
بصت بَصَّة حافظها..
عَضِّت فوق نَوَاجِزها..
ضحكت ضحكة من غيظها
وقالت أفتحه أحسن..
لِم الليلة يُستَحسَن..
رَدِّيت..مشكلة فالتاتش..
عرفتي ليه بقى ما رديتش!
ف قالت..سهلة مش صعبة
ورب الكعبة ما ح اسيبك..
أنا وخداك على عيبك..
وعارفة كل ألاعيبك..
ما تستهبلش..
ضِحِكت وقلت ح نقَبَّح؟!
قالت لي ولسه راح أَردَح
واقولك م المِنَقِي خيار..
قالتها وعينها طاقَّة شَرار..
عيليتها كُلها أشرار..
يموتوا ويدخلوا بينَّا..
ح ييجوا بسرعة من رَنَّة
وانا بيني وبينهم تار..
وده يوم نَحس..
كأن أخوها شَلضَم حَس..
شلضم أخوها م الكُفَّار
لا بيفهم ولا بيحس..
قالتلي..أَرُد؟
لو رديت ح ييجي بجد..
أكنسل ولا ارُد عليه؟!
ما عرفتش أَرُد ب إيه
و مِلت عليها أَسَجِدها..
وحطيت خدي بين إيدها
قُلت سيبينا من شلضم..
وحشتيني..خديني بين
إيديكي أحسن وضميني..
سيبيني احلم..
يا مالكة عُمري وسنيني
بجَد عليا بتغيري؟!
مين فالكون داهو زيِّك..
أنا بحبك..
وحافظ عالدوام عهدك..
آهو التليفون فتحتولِك
انا ملكك وفتِّشي فيه..
ردِّت بعد إحساسك
ح افتش ليه..
ح اعمل إيه..
ما انا بحبك..
مالوش لزمَه..
مفيش داعي تكون أزمة
مادمت معايا وفحضني..
طب إوعدني
ما تتكرَّرش..
واحلف لي انت
ما بتكدبش..
وان الرنة من صاحبك
حلفتلها إني مش ب اكدب
وانا معجون ب مية كدب.
داريت المشكلة ف الحب..
قلت يارب سامحني..
أخوها نفسه يدبحني..
وشلضم اخوها له سطوَة..
إيديه باصمة على المطوة..
ومتعود يشوف الدَم..
نفسه يشوف فجتتي خُرم.
ودمي يا دوب مكفِّيني..
مادام كلمة ح تحميني..
وحُضن وبوسة تستُرني
ف إيه يعني..
بدل جاري مايسمعني..
وشلضم ييجي يوجعني..
لأجل الدم ما يخُرِّش..
كدبة بسيطة ما تضُرِّش..
شلضم أخوهامابيفهمش
وأنا ناوي ما تتكررش..
ف أسلم لي أبطل نَكش
د/نشأت عادل
ليست هناك تعليقات:
إرسال تعليق