👍عطشان للقانا ولمتنا👍كلمات الشاعر/ خالد عبد المعطي

 لسه رمضان موصلش و ليه

انا حاسس انى يا ناس عطشان..

..

لا و منايا انى أجرى عليه

و اكون فى لقاه اول انسان..

..

عطشان من بدرى لنور لياليه

و لخير المولى اللى ماليه

و لصوت دعاوينا فى كل أدان..

..

عطشان للقانا و لمتنا

و فوانيس بتنور حتتنا

و ضوليلة حب مش ضل حيطان..

..

تحمينا من حر زمانا

و تفتح للكل بيبانا

و تقول اهلا يا اهل و يا جيران..

..

يا شيخ سيد عطشان تواشيحك

و مديحك و جمال تسابيحك

يملأ قلوبنا مش بس ودان..

..

و يا رفعت جهز مفاتيحك

و افتح شبابكنا لخير ريحك

نور ايامنا بالقرآن..

..

و يا روحنا جالك شهر الخير

و صبح وسواسنا بفضله اسير

نسجد و نسبح للرحمن ..

..

سبحانه اللى بفضله هدانا

بأيام معدوده شدانا

لنعيم ماخطرش فى بال انسان..

..

انهار من خير تروى عطشنا

و تزيح الشر اللى لطشنا

و نعم م الله اشكال و الوان..

..

لو تصدق بينك و بين ربك

هتلاقى النور نور دربك

و الخير حواليك مالى الأركان..

..

ذكر و تسبيح

صدقه و تراويح

و صيام بيزيح تقلك يا زمان..

..

و عيال ماليين الليل افراح

و الخير بينا داير سواح

مالى قلوبنا نورك يا ايمان..

..

لسه رمضان موصلش و ليه

انا حاسس انى يا ناس عطشان..

..

لا .. و منايا انى أجرى عليه

و اكون في لقاه اول انسان..

..

#خالدعبدالمعطى