زمان والبساطة
×××××××××
الحياة كانت بسيطة
والجميع كانوا حبايب
والبيوت ع الطوب ونى
لا تشطيب ولا كهارب
والنوم كان ع الحصيرة
والمخدة جوزين قوالب
وان عطشت القلة جنبك
ولو جعان فيه عيش ورايب
والكانون وفرن بلدى
وسط بيت اهل وقرايب
والاعمار كانت طويلة
والمرض عن ناسنا غايب
والكبير حامد لربه
متقلش عمدة او حتى نايب
والطرمبة وسط بيته
فيها حوض مليان طحالب
والحيطان جواها شق
زى خزنة تشيل سبايب
والنهارده بيته جنة
بس مليان بالمصايب
الفلوس والخير كتير
بس عدمان م الحبايب
والاعمار بقت قصيرة
وحتى موت وعليه ضرايب
كل خطوة بالفلوس
خلى شاب وشعره شايب
وكتر فواتير الحكومة
ولدت فى الناس مصايب
فرقت اخ من اخوه
وشتتت اهل ونسايب
كان زمان الكل واحد
والبشر كانوا حبايب
×××××××××
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق