---- حلاوة روح ----
انا محتار مع بابى يكون مفتوح لاصحابى
اويكون مقفول ويزعل منى احبابى
غريب الباب مالوش مقبض ولا متراس
ولو هبت شوية ريح تفتحوا وخلاص
واجيب متراس واقول مقفول
واعيش وحدى وعن نفسى اكون مسئول
واقول انا ونفسى نعيش اصحاب
احكيلها وتحكيلى بدون دهشة ولااستغراب
وامسح دمعتى بايدى واقول عادى
ولاحد يعرف نقاط ضعفى ولايتهمنى بعنادى
واقول يكون مقفول كده افضل
والكل يغيب عن نفسى وانا افضل
واواجه نفسى بعيوبها
واكون لنفسى ايوبها
واصبرعليها واعينها
اصلها نفسى وانا منها
بابى كان مفتوح ودخل منه كتير اوجاع
لوم وعتاب بصوت مبحوح وصوت عالى وجالى صداع
والكلمة تبقى حدوتة وتركب بساط الريح
وتدخل وتطلع والباب مفتوح بدون تصريح
واعيش غرقان وتكون الكلمة دوامة
وتسحبنى لكل ودان وملاقى لشطى عوامة
واموت فى اليوم متين مرة
بسبب كلمة طعمها مرة
واقفل الباب واقول كده احسن
من غير احباب من غير اصحاب كده احسن
واسمع دق على بابى اقول حاضر
وعينى تحن لاصحابى وقلبى يكون حاضر
واشوف الباب واهز دماغى واقول معلش
قلبى ياباب كده زيك كمان مفتوح وكله يخش
واعيش الرحلة من تانى
ومن تانى الاقى الكلمة وخدانى
ومعاها على بساطها منين ماتروح
واعيش عمرى حلاوة روح
--------------
ابراهيم على
ليست هناك تعليقات:
إرسال تعليق