---- الخط المستقيم ----
الخط المستقيم
اقرب مسافة لنقطتين
المهم لو نقطة واضحة
ممكن تشوف التانية فين
ممكن تتوه ويبعد طريقك
والوصول يحتاج سنين
وممكن تشوف من غير غشاوة
وتعرف بسرعة انت مين
فى ناس ماتعرف وزنها
وشايفه الرشاقة فى جسمها
وتسأل طريق الطبلة فين
وناس تصون من نفسها
وماتقبل حرام على نفسها
وتاكل فتات وتجوع يومين
وناس اصيلة وناس خسيسة
وناس سمجة وناس حسيسة
والكل مابين النقطتين
والخط المستقيم محتاج ثقافة
والثقافة تحتاج عقول
والعقول مكانها فين
مقفول عليها باب كبير
اسمه الظروف
ويفتح بس مرتين
مرة يقول اتفضل وبلاش فلسفة
وهات للعيال لقمتين على هدمتين
اويقول ممكن ساعدتك تهز طولك
وتطرقع صوابعك عندك النهاردة حفلتين
ومازال البحث جارى
والخط المستقيم
بيدور بنفسه عالنقطتين
----------------
ابراهيم على
ليست هناك تعليقات:
إرسال تعليق