كتب الشاعر/ خالد عبد المعطى .. غصب عني و باختياري ..

(غصب عنى و باختيارى)

غصب عنى وباختيارى
قلبى عاشق مش هدارى
بس عزة نفسى عندى
اقوى من حبى ونارى..

مستحيل لو كنت اخر
واحدة فى العالم ده كله
قلبى يضعف مرة تانية
او يعيش لو حتى ثانية
راضى فى حبك بذله..

لو مشيت ع الشوك فى بعدك
او قاسيت م الوحدة بعدك
عندى اشواك الكرامة
اغلى من وردك و فله..

بس قبل ما نفترق
والامانى الغالية تهرب
من ادينا وتنسرق
نفسى اهمس جنب قلبك
قبل ما نفارق واقوله..

غصب عنى و باختارى
قلبى عاشق مش هدارى
بس عزة نفسى عندى
اقوى من حبى ونارى..

لو فيه طريق بينى وبينك
من خيالى همسحوا
لاجل ما اتوه فى الرجوع..
لو بحورى نبعهامن بحر عينك
هرتوى من بحر عطشى
و ترتوى انت دموع
لو طريقى بدره غاب
ولا شمسه مرة تاهت فى السحاب
مش راح فى يوم امشى فى طريقك
لو فى اركانه شموع..

كلمة واحدة نفسى اقولها
بس جرحانى حروفها
عايزة تخرج من لسانى
وبتداره فى خوفها
قلبى ثاير بس حاير
تنكتم كلمة لسانى
ولا تخرج من شفايفى
حاضنة احزانى فى كفوفها..

غصب عنى وباختيارى
قلبى عاشق مش هدارى
بس عزة نفسى عندى
اقوى من حبى ونارى..

زى ما بروى غرورك
بالمحبة وباشتياقى
زى ما طبعى اصونك
الكرامة عندى دائى
زى ما بعشق عيونك
برضوا عاشق كبريائى..
ومستحيل

مستحيل لو كنت اخر نجمة
هضوى فى سماية
مستحيل لو كنت اخر نسمة
راح تسرى فى هوايا
مستحيل لو يوم فراقك
هو يا عمرى النهاية
مستحيل امشى فى طريقك
فوق كرامتى
خطوة واحدة من خطايا..

كلمة واحدة باقية عندى
من زمانى و ذكرياتى
عايز اقولها بس عندى
فارض عليا سكاتى
كلمتى اخر ما بينا
اخر احلامى وحياتى..

غصب عنى و باختيارى
قلبى عاشق مش هدارى
بس عزة نفسى عندى
اقوى من حبى و نارى
..
#خالدعبدالمعطى