الغول
ــــــــ
الغول بيتغوّل
ما احنا اللي سيبنا له
الحبل م الاول
ضعفنا واكلنا
من يوم ما وكّلنا
الغول على فلسطين
أمم ومتحدة
ع الظلم والمظاليم
تقف مع الظالم
وتبيع اصول مساكين
ماهو احنا اهو ساكتين
نشجب ولا بنغضب
ونقول ما نتحرك
ولا حتى بالضالين
والخيط في ايد ريكا
بتحركه بشويش
ما تقولي يا ماريكا
ده اللي يروح مايجيش
يا قادره ومخاويه
وعلى الخراب ناويه
ده احنا اللي نستاهل
على الحدود واقفين
ما دام بعيد عننا
ان شالّه تبقى طين
شايفين ومش سائلين
فى العوزه مش شايفين
اه لو يعود الزمن
ونكونوا بني أدمين
لا عيونّا مكسوره
ولا فينا حد ضنين
كف الميزان مالت
لما نسينا الدين
مسك الميزان بايع
ايده على الكفة
فى الأصل كان صايع
فينا بيتشفى
يكسر ميزان العدل
وبيقلب الدفة
ايده بسيف الزور
على الرقاب منصوب
مع اللي فى ايده بارود
وضد ضرب الطوب
واهل الحقوق فى انفاق
واهل الضلال ع الأرض
لا يراعوا حرمة دار
ولا حتى حرمة عرض
والعيب على المالك
ساب الغنم للديب
ولا حتى يتعارك
وده هو اصل العيب
تاجر سلاح مكسبه
يشعل فتيل الكرب
واللي يفوت ملعبه
يعلن عليه الحرب
شعر
عبد الرحيم على
ليست هناك تعليقات:
إرسال تعليق