سنين عُجاف
حبيبي ليه مكتوب علينا
البعاد قدرنا سنين عُجاف
نعذب قلوبنا بنار تكوينا
ده مش عدل وﻻ إنصاف
إمتى
تسيب المال والغربة
وﻻ مكتوبلي أعيشك ذكرى
عايشة ف نار بتزيد وصعبة
ومش لقياك إﻻ ف فكره
وحشني كتير طعم اللقا
وحنين الدفا اللي غاب عني
إن كنت حبيبي تعبك الشقا
أنا اللي بهجرك تِعبت تَمني
ياما قلتلك إرجع سامع
وإنت تصبرني بكلام معسول
ﻻ بيرضيني وﻻ معايا نافع
زي قلتهُ لو لبكرة تقول
محتاجالك بجد أكتر م اﻷول
مشتاقالك قوي وخايفة أتحول
قرب تعالى أنا تعبت قوالة
عايزاك جمبي ماتغبش تطول
فين هو الحب اللي حبتهولي
وإنت الغربة وخداك مني
فين هو الحنان اللي إدتهولي
ظالم نفسك وبتظلمني
شايفة قدري بس ع الورق
خايفة عمري مني يتسرق
حبال الوداد دوبها البعاد
ومركب حبنا قرب ع الغرق
وإنت ع الشط عمال تِتفَرج
بتجري يمين وشمال وبس
ياتيجي وتجيب طوق الفَرج
ياتسبني أغرق ف بحر اليأس
يوسف أبو زينة
5/10/2024
ليست هناك تعليقات:
إرسال تعليق