الذكرى السنوية الأولى لوفاة الابن الخلوق Tarek Elgohary رحمه الله وأسكنه فسيح جناته
مش قادر أنسى
طلتك
ولا ضحكتك
ولا خفة الدم الجميل
مش قادر أنسى
دخلتك
ومناغشتك
والبسمة حلوة سلسبيل
تجيني تسأل عن طلب
كالعادة وبكل الأدب
شايل ملازمك والكتب
رايح على مستر بازيد
==========
ساعة ما أشوفك بابتسم
وسعيد لأني باسمعك
ناخد وندي في الكلام
باللطف مع ذوقك معك
وأحب أطول في الحديث
وكل يوم شايفك عريس
معرفش إن الموت خسيسس
هيجبني يوم وأودعك
==========
طول حياتك يا حبيبي ابن موت
ما في لك في الدنيا حاجة
غير تفوت
عشت عمرك
ع المحطة في انتظار
لما ييجي القطر
ينعي بأعلى صوت
مستحيل الدنيا
تبقى لك سكن
وانت الغريب
وماشي فيها بالكفن
صدقنا بعدك
فيه ملايكة بتندفن
ونهيل عليها الرملة
ودموع السكوت
==========
قبل السفر بيومين تلاتة
كنت عندي
معرفش ليه قلبي انقبض
والحزن خدني
مع إن كانت ضحكتك
أصفى وندية
والبشر بيغمر طلعتك
والخطوة جاية
كأن جايلي أودعك
قبل المنية
وتكون دي آخر بصمتك
بتسيبها عندي
أحمد محمود عوض سعيد
ليست هناك تعليقات:
إرسال تعليق