سجال ⚡على رصيف العمر⚡
بين الشاعر م. محمود الحريري
والشاعرة أ. صفاء الخواجة
⚡⚡⚡⚡⚡⚡
م. محمود
كبرنا خلاص وعجزنا
وبتقرَّب محطتنا
وحيلنا اتهد وتعبنا
وشُفنا كتير في رحلتنا
***
أ. صفاء
كبرنا قوام . فى دنيتنا
وتاهت كل شلتنا
مابين ميت وبين عاجز
وشكوتنا لحيط بيتنا
***
م. محمود
قاسينا كتير فـ دنيتنا
ودُقنا المر في حياتنا
قضينا العمر بنعافر
وفـ الآخر ..خلاص شِبنا
***
أ. صفاء
دي ياما حياتنا ورتنا
وشِلنا الحمل وتعبنا
بدون شكوى بنتحمل
في جوانا . وحتتنا
***
م. محمود
بكينـــا.. والعيون دبلت
على العمر اللي عدى وفات
وفـ صدورنا القلوب تعبت
من الوحدة اللي فيها سكات
***
أ. صفاء
عمودنا الفقري بقى يشكي
وبيزيق ويئلمنا
وفى عيونا الدموع تعبت
بنحبسها وتغلبنا
***
م. محمود
فقدنا كتير من الصحبة
بقينا عايشين مع الغربة
فقدنا الأهل والعزوة
فقدنا الصحة والقوة
***
أ. صفاء
بكينا كتير وأحبابنا
سابونا فـ ضعف قوتنا
وحتى الأهل.. تركونا
يامين يمسح لدمعتنا!!
***
م. محمود
بقينا نحسب الخطوة
وحركتنا بقت صعبة
ولما نمشي نِتسَنِّد
ونسمع طقّة الرُّكبة..
***
أ. صفاء
يارب.. لِيك بنتوجه
ما تحرمنا لعزتنا
دي أيامنا .. وجبروتها
بقوة يارب هزتنا
***
م. محمود
مفيش غيرك يا رب معين
يهوّن سكة الرحلة
ويجعل خيرنا في الباقيين
ونهايتنا تكون أحلى
***
أ. صفاء
بلاش نتقل على ولادنا
بلاش الضعف يغلبنا
ياريت تنقذنا ..من غُربة
وخلي الجنة موعدنا
***
سجال⚡ على رصيف العمر⚡
بقلم
الشاعرة أ. صفاء الخواجة
الشاعر م. محمود الحريري
ليست هناك تعليقات:
إرسال تعليق