بلاش ترحل
**********
انا ما بيدى اكون ساحر
وأفرك ع الفانوس والاقيك
ولا طير فى السما مهاجر
اطير وأحط ابص عليك
انا جوايا شوق قادر
يجيبك لو فى جب داريك
ودايما ربنا جابر
بعطفه ورحمته يراضيك
ياحب العمر ما تسافر
وجنب القلب هنا خليك
نداوى الدمعة بالفرحة
وضحكة قلبى تملى عنيك
ياطيف ضلل على سنينى
وشوق عشته على اراضيك
رسمتك ضى والاقينى
بضيك نور ومن حواليك
انا العاشق ومش فارق
تجيلى واللا اجرى عليك
بلاش تبعد ولا تهاجر
داوينى باللقى واداويك
ونحضن شوقنا ونعافر
واعوم واغوص فى سحر عنيك
بلاش تبعد ولا تسافر
راعينى بالوداد واراعيك
انا شطك ولا ح أغادر
دروب الشوق دى ليا وليك
بلاش تبعد حبيب قلبى
انا بناديك وقلبى شاريك
***********
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق