" سمك 🐳 - لبن 🍼- تمر هندى 🍺 "
(حكاوى القهاوى)
▪︎نص معسل وحجر قص
▪︎وكيلة فحم لزوم الرص
▪︎ قاعد أنا ع القهوة ف حيره
▪︎ ويا إزازة بيرة كبيره والتعميره
▪︎معاها المَزَّه تيجى ع السيرة
▪︎وأما تخس الولعة قصادى
▪︎أرجع أنادى الواد بغدادى
▪︎نص معسل وحجر قص
▪︎وكيلة فحم لزوم الرص
▪︎جنب مشنة كوسة وخس
▪︎إبن فكيهة يذاكر الدرس
▪︎من غير حس يدوق جرجيره
▪︎"والسعودية دى شبه جزيرة"
▪︎عاوز يطلع حاجه كبيرة
▪︎وأما تخس الولعة قصادى
▪︎أرجع أنادى الواد بغدادى
▪︎نص معسل وحجر قص
▪︎وكيلة فحم لزوم الرص
▪︎وعشان تاخد حق البث
▪︎ممنوع تخرج بره النص
▪︎شرط إذاعة "ويا شاكيرا"
▪︎ده البرنامج حسن السيرة
▪︎متقولش الشرق ولا جزيرة
▪︎وأما تخس الولعة قصادى
▪︎أرجع أنادى الواد بغدادى
▪︎نص معسل وحجر قص
▪︎وكيلة فحم لزوم الرص
▪︎أما لافندى فنازل رقص
▪︎وعيونه السوده تبصبص
▪︎ باع القردة وجاب خنزيرة
▪︎ومامى هتبعتله التأشيرة
▪︎بابا من بنها وهيه سفيرة
▪︎وأما تخس الولعة قصادى
▪︎أرجع أنادى الواد بغدادى
▪︎نص معسل وحجر قص
▪︎وكيلة فحم لزوم الرص
▪︎وعشان كله خيبه وهجص
▪︎وجو نطاعه وعيبه ونقص
▪︎هطفى الولعة مع التعميرة
▪︎وأرعى يوماتى حق الجيرة
▪︎وهكون حسن السير والسيرة
▪︎وأما تفوت الولعة قصادى
▪︎مش راح أنادى على بغدادى
▪︎وأنسى القص و دلع الرص
▪︎وأرجع بيتى ف أول باص
عجبى!!!
(خالد فاروق)
ليست هناك تعليقات:
إرسال تعليق