ردا على قصيدة "سن الستين"
لشاعرنا المبدع م/ محمود الحريرى
قصيدتى / (بعد الستين)
( بعد الستين )
▪︎بالعكس أنا حالى هيتبدل
بعد الستين
▪︎دايما مستنى اللحظادى
وبقالى سنين
▪︎وسعادتى هتبدأ م الأول
مع ناس راسيين
▪︎نظرتى للدنيا هتتحول
وكلامى رصين
▪︎مش هدخل ف حوار غوغائى
لإتنين تافهين
▪︎وهركز ف زمانى الباقى
للإيجابيين
▪︎وهروح النادى مع صحابى
أغطس ف بسين
▪︎و ابدأ مشروعى اللى نويته
من ست سنين
▪︎أنا ياما تعبت وأنا صغير
كنا مراهقين
▪︎بابا يهشتك، ماما تغَيَّر
ولَّا التسنين
▪︎وخسارتى من لعب الأوله
وعيال مجانين
▪︎وحكاوى لمامتنا الغولة
رعبت ملايين
▪︎ودخول الجامعة بمجموعى
وتنسيق مش فايق لدموعى
وصحاب ضايعين
▪︎وأتخرج أنا بطلوع الروح
وأستنى سنين
▪︎وأيام جاية وأيام بتروح
ع البنى آدمين
▪︎ف الشغل أتعود إنى آخد
مليون إسفين
▪︎و إن قلت هبَكِّرْ بمعاشى
يلطموا رافضين
▪︎ده أنا عمرى هيبدأ يا أخواننا
بعد الستين
▪︎والصحة هترجع من تانى
وألغى التأمين
( خالد فاروق )
ليست هناك تعليقات:
إرسال تعليق