انا مين ..؟
انا واحد مش واخد بالي
عايشها ب سلامة نيه
لو كانت الدنيا دي شغلاني
كنت اشغل روحي وعنيه
انا قلبي عمره مايتحرك
حركاته بطيئه شويه
لو دق دقاته اسمعها
واسمعها بتقل وحنيه
عنيه تشوف اي وحاشه
اخاصمها قول شهر شويه
علي الهادي عايش ومسلم
ولااعكر دمي بتفاهات
وعنيه حافظها وصاينها
وبغض الطرف عن المحرمات
منا عايش وحدي وفي حالي
بترحم دوما علي الاموات
مشغول بحلالي وحرامي
اتحراهم قوي ميه الميه
وبخاف من ربي اللي خالقني
خايف من الدور يجي عليه
وانا عاصي وبعيد عن ربي
و الخاتمه تكون خيبه قويه
اتحسر واندم علي يومي
لو عدي بذنوب عليه
وبدعي ربي يرحمني
و الخاتمه في جنه ابديه
القاه وانا راضي ب أعمالي
النظره إليه تقر بها عنيه
بكده اكون واخد بالي
ومحرص في ايامي الجايه
عابد الفقي
ليست هناك تعليقات:
إرسال تعليق