انتخابات وزحمة
وخيبة بالويبة
والكل يخدم البيه
والناس تجري ورا كيلو لحمة
ويقولوا كسب سعادة البيه
بتموت نفسك ليه ع الكرسي يابيه
ده كرسي مكسور ويلف ويدور
وبكرة الدور ميجيش عليك
ماهي كراسي قلابة
مش زي الناس الغلابة
هدفك منها الحصانة
وفلوس ورشوة ياما
ومصالح تتصالح
تملي بيها الكرش والجيب
ومصيف ف مارينا
وشقة ف العالمين
والكل يقولك يا بيه
والغلبان تضحك عليه
بكبون فتح الله ابو مية جنيه
ياخي اختشي ع دمك
وعيب عليك
طب خلي المية متين
والدعوة تبقي اتنين
ونحاجيك بها يوم الدين
انت يعني خسران ايه
كله بدلات
مكان البدلة هات
وكمان انتقالات ومواصلات
وفي الجلسة نعسان ومش دريان
بيقولوا ايه
خليك كده زي النعجة ال ما ليها لزمة
ولا عارفة بتعمل ايه
تعبنا منكم ومن هزة روسكم
وكمان ايديكم ال ع طول موافقة يابيه
ع الهدم والخراب وفساد التعليم
والصحة رايحة ف داهية ولا حد
بينا ياناس دريان
حد يقولنا نعمل ايه
مقاطعة وقاطعنا
وصوتنا ملهوش لزمة
طب الحل ايه
يارب استبدلهم من عندك
بناس ف قلوبها رحمة
ترحمنا من الزحمة
وطوابير العيش
وتعرف بتعمل ايه
يكون لها رائ ودور
وتقضي ع المحسوبية وقرايب البيه
وتحس بالغلبان
ال طول العمر تعبان
ولا عارف يعمل ايه
ليست هناك تعليقات:
إرسال تعليق