كتب الشاعر الراقي م/ محمود الحريري ¥بحور الشوق ¥

"بحور الشوق"
قصيدة باللهجة العامية
----------------------------
عديت بحور الشوق
ومعايا أحزانى ..

وركبت فوق الموج
قام شالنى ورمانى

ومشيت على الأشواك
وجراحى وجعانى

دقيت على الأبواب
وناديت بصوت عالى

ماسمعت أى جواب
ولا حد نادانى ..

روحت اسأل العراف
واحكيله عن حالى

وليه حبيبى راح
وهجرنى ونسانى

قام بص لى العراف
وبحزن واسانى ..

قال لى ياريت تنساه
شوف لك حبيب تانى

إزاى ياناس انساه
وصورته فى خيالى

دايما بافكر فيه
إسمه على لسانى

هاروح ادور عليه
لو إيه هيجرالى ..

يمكن ف يوم ألاقيه
والدنيا تصفالى ..
----------------------------
بقلم : م/ محمود الحريرى