كتب الشاعر/ أحمد رأفت .. أنت حالة..

انتِ حالة

للشاعر / أحمد رأفت

انتِ حالة

البعاد عنها استحالة

السفر جواها جايز

والرجوع منه احتمالة

انتِ بدر ف ليل تمامه

بالقى حواليه

ألف هالة

لو هأقول ف عِينيكِ قولة

عمري ما يكفيش قِوالة

انتِ فجر ولونه وردي

يتولد

ساعة لقا

يبتسم

يمحي الشقا

يترسم

بين التمني والتغني والبكا

انتِ توهة

 ف قلب توهه

ف قلب دايرة

نبضة جوة القلب حايرة

خطوة مليانة اغتراب

في براح العشق سايرة

رغبة طاغية

بتعاديني

تزرع الشك

ف وتيني

تهزم الحلم اللي ساكن

 بين ضلوعي

وفوق جبيني

آه يا حالة عشق طاغية

في براح قلبي الشريد

كل ما باقرب ألاقي

حبك المنشود

بعيد

ألف دوامة قلق

توئد الحلم الوليد