⚘ليه رافضاني⚘ كلمات للشاعر م/ محمود الحريري

"ليه رافضاني"
قصيدة باللهجة العامية
------------------------------------
من وحى قصيدة "رفضاك"
للشاعرة الراقية أ. صفاء الخواجة
----------------------------------------
ليه رفضانى يانور العين
واحنا غرامنا بقاله سنين

عمرى ماخُنتِك أو غشيتِك
أو زعلتِك لو ساعتين

أوخليتْ ف عنيكى دموع
أو سَبِّبْتْ ألم وأنين

ليه ياحبيبتى بيتهيألِك
إنى ماكنت عليكِى أمين

ياريت تدينى جواب لسؤالي
ليه رفضانى يانور العين

ليه رفضانى ورفضة غرامى
وقلبى ماصدق نرجع تانى

ليه عاوزانى انسف أحلامى
وليه تجبرى قلبك ينسانى

أنا علشانك ابيع الدنيا
وعمري ياروحى ماكنت أنانى

إنسى كلامك.. وافضلى جنبى
أنا مقدرش.. أعيش وحدانى

بس قوليلى ليه رفضانى
ليه رفضانى يانور العين

رفضة تعودى أوتتسامحى
وانتى بعادك بيزيد جرحى

ليه تلومينى وتهاجميني
د انت ملامحك زى ملامحى

ارمي همومك وافتحى قلبك
وانسِى خصامك يلا وصالحى

بس ياريت ياحبيبتى تقولى
ليه رفضانى يانور العين

هافضل شايلك جوه عيونى
مهما بعدتى وروحتى لفين

وافضل طول أوقاتي بَحِبِّك
واقضى العمر ف شوق وحنين

وابقِى افتكرى يوم ماصالحتِك
وانتى رفضتى يانور العين
--------------------------------------
بقلم :م/ محمود الحريرى