⚘كارثة إسمها مهرجانات ⚘ بقلم الشاعر/ م.محمود الحريري

"كارثة إسمها مهرجانات"
قصيدة باللهجة العامية
-----------------------------
كارثة واسمها.. مهرجانات
ماناخدش منها غير تفاهات
نلاقى فاشل ..عامل مطرب
وقال .. بيغنى مهرجانات

ويتنطط ويترَّقَص
وناقصه يكون
ف إيدُه صاجات

يطُل علينا بسلامته
ويقرف فينا بسماجته
وع المسرح يقول سخافات

كلام فارغ ملوش معنَىٰ
وصوت مزعج يسَمَّعنا
وينزل خبط ف دماغنا
وبيوزع علينا سلامات

كلام خارج عن المألوف
وقلة ذوق على المكشوف
صريخ مجنون ورقص سيوف
مايفرقشى .. عن العصابات

كلام يخدش حياء الناس
مفيش نخوة ولا إحساس
وفاكر نفسه أبونواس
وله أتباع .. وبالعشرات

مفيش أنغام ولا ألحان
وصوت مبحوح ملوش عنوان
يغنى وهو فى التوهان
بدون معنى ولا كلمات

ياعم المزعج ارحمنا
بلاش تهريج بإسم الفن
خلاص ملينا وزهقنا
وللطرب الأصيل بِنْحِّن
وللزمن اللى عدا وفات
------------------------------
بقلم : م/ محمود الحريرى